As melloras están a realizarse no complexo deportivo da piscina municipal da Laracha
Aproveitando o peche temporal do complexo deportivo da piscina municipal da Laracha, o Concello está a desenvolver o proxecto de renovación do pavimento no vestiario masculino desa instalación.
A actuación, consiste na substitución en toda a sala (vestiarios e duchas) do pavimento de vinilo anterior. Tamén, a nivelación do solo existente, realizando a impermeabilización e colocando o novo acabado de plaqueta cerámica antideslizante. O proxecto na piscina municipal supón un investimento superior aos 15.000 euros a financiar integramente con fondos propios municipais.
Outras obras na fase final
Por outra banda, as obras de mellora da rede viaria na parroquia de Lestón promovidas tamén polo Concello da Laracha xa están moi avanzadas. A actuación consiste na renovación do pavimento entre o núcleo urbano de Paiosaco, desde a rúa Feal, ata o lugar de Lestón.
Estase a dotar á estrada, duns novecentos metros de lonxitude, cunha nova capa de aglomerado e sumando á plataforma os sobreanchos existentes. Tamén, se contempla a mellora da drenaxe das augas pluviais. Os traballos completaranse co pintado das marcas viarias das marxes da calzada para aumentar a seguridade. O proxecto está valorado en 92.000 euros.
