A portavoz socialista Palomi Rodríguez Castiñeira, visitou o parque empresarial xunto á xerente de SEA, Beatriz Sestayo
O Psoe da Laracha proporá ao Concello humanizar o parque empresarial do municipio. A solicitude avanza unha vez que Suelo Empresarial do Atlántico (SEA) anunciou que se contratará un estudio de costes e urbanístico para a súa ampliación. O anuncio chega despois de que os concelleiros Palomi Rodríguez Castiñeira, Alba Toba, Pepe Martínez e Pili Neira visitasen o polígono xunto á xerente de SEA, Beatriz Sestayo.
Así, a portavoz socialista na Laracha, chamará a solicitar os Fondos de Recuperación Económica Xusta do Ministerio de Transición Ecolóxica. Éstes promocionan liñas de actuación para fomentar a transición ecolóxica, mobilidade, industria sostible, humanización de espazos e a convivencia industria-humanización. O obxectivo é mellorar a contorna do parque e adecualo para peóns e ciclistas.
«Polígono pioneiro na provincia»
«Temos que aproveitar a dinámica da boa marcha do polígono co impulso do SEA”, reivindicou Rodríguez, quen subliñou que este parque empresarial “ten que
aspirar a ser pioneiro nestes aspectos” na provincia. Ao fío disto, engade que a mobilidade sostible e o transporte ecolóxico favorecen os espazos de humanización nos que tamén entra a bicicleta e os hábitos biosaudables». E o concello “debe estar á vangarda”.
Por último, Rodríguez agradeceu ao SEA a súa implicación co concello ao contemplar a ampliación da área industrial da Laracha como un dos seus “obxectivos” ao tratarse “dunha zona estratéxica e con óptimos recursos para a instalación de novas empresas”.
