O parque está na zona da Porta Santa, preto do centro sociocultural
O Concello da Laracha vén de crear e abrir ao público un parque biosaudable na zona da Porta Santa. Unha parcela de titularidade municipal moi próxima ao centro sociocultural da vila. O alcalde, José Manuel López Varela, e a concelleira de Deportes, Patricia Bello, comprobaron in situ o resultado da actuación realizada nos últimos días.
Deste xeito o Concello aposta por continuar ofrecendo aos veciños novas posibilidades de ocio que, ao mesmo tempo, fomentan a realización de actividades físicas beneficiosas para a saúde dos usuarios. Este é o quinto circuíto biosaudable dispoñible no termo municipal. Os outros catro sitúanse na área recreativa de Gabenlle, no parque Maximino Canedo (A Laracha), no paseo marítimo de Caión e na urbanización Monte Claro (Cabovilaño).
Os obxectivos fundamentais da presenza dos parques biosaudables son influír positivamente sobre as persoas maiores para conseguir cambios efectivos nos seus hábitos de vida. E así evitar o deterioro psicomotor coa práctica de actividade física e, entre outros, ampliar a oferta de instalacións deportivas que existe.
Actuación no río Acheiro
A Laracha continúa mostrando o seu firme compromiso coa posta en valor dos medios fluviais e espazos naturais co labores de eliminación da maleza. Nesta ocasión, as brigadas medioambientais municipais están a centrar a súa actuación no río Acheiro cunha ampla intervención en seis quilómetros. Desde a ponte de A Beria (parroquia de Golmar) ata a desembocadura no río Anllóns á altura do lugar de Samiro (parroquia de Vilaño).
O patrimonio natural que conforman os ríos laracheses son lugares de especial beleza paisaxística e biodiversidade animal e vexetal. Por iso, desde o Concello da Laracha animan aos veciños a descubrir os medios que ofrece os ríos Acheiro, Anllóns, Bradoso e Vilán. Grazas ás actuacións xa desenvolvidas, son de cómodo acceso a pé e permiten a realización de rutas de sendeirismo.
O alcalde, José Manuel López Varela, e o concelleiro José Ramón Martínez Barbeito reuníronse cunha das cuadrillas nas inmediacións da ponte de A Fraga para interesarse polo resultado das actuacións.
