O novo parque biosaudable será o quinto equipamento destas características dispoñible para uso público no termo municipal
Paiosaco contará en próximas datas cun parque biosaudable. O Concello instalará este equipamento na zona da Porta Santa nunha parcela de titularidade municipal moi próxima ao centro sociocultural da vila. Este será o quinto circuíto biosaudable co que contará o Concello. Os outros catro, que están operativos actualmente, sitúanse na área recreativa de Gabenlle, parque Maximino Canedo (A Laracha), paseo marítimo de Caión e urbanización Monte Claro (Cabovilaño)
Deste xeito o Concello aposta por continuar ofrecendo aos veciños novas posibilidades de ocio. Ao mesmo tempo fomentase a realización de actividades físicas e, por tanto, beneficiosas para a saúde dos usuarios.
Os obxectivos fundamentais da presenza dos parques biosaudables son influír positivamente sobre as persoas maiores para conseguir cambios efectivos nos seus hábitos de vida. Tamén, evitar o deterioro psicomotor coa práctica de actividade física e, entre outros, ampliar a oferta de instalacións deportivas que existe no termo municipal.
Proxecto de mellora da estrada de Montemaior
A Axencia Galega de Desenvolvemento Rural (Agader), dependente da Consellería do Medio Rural, vén de trasladar ao Concello da Laracha a resolución da concesión da achega económica para a execución do proxecto de mellora da estrada da parroquia de Montemaior que vai desde Santa Margarida á Silva.
A actuación formará parte do Plan marco de mellora de camiños municipais de acceso a parcelas agrícolas, impulsado polo Programa de Desenvolvemento Rural (PDR) e cofinanciado polo Fondo Europeo Agrícola de Desenvolvemento Rural (Feader).
Por tanto, nos próximos días o Concello da Laracha iniciará o procedemento de contratación deste proxecto. Consiste na completa renovación do firme desta vía, que é de gran importancia ao comunicar as fincas agrícolas desa zona coa estrada DP-2404 que dirixe á Silva (concello de Cerceda). Tamén da acceso ao termo municipal de Carballo por Paradela. Presenta unha lonxitude de 1.250 metros e unha anchura media superior aos cinco metros. Se mellorará tanto a plataforma de rodadura dos vehículos como a drenaxe da estrada para reforzar a seguridade.
O orzamento do proxecto ascende a 65.434,08 euros, dos cales a Xunta de Galicia achegará 53.961 euros. O Concello asumirá a parte restante con fondos propios municipais.
