Trala aprobación definitiva dos orzamentos por 8.618.000 euros publicada no Boletín Oficial da Provincia
O Concello da Laracha comezou onte a operar cos novos orzamentos xerais municipais do exercicio económico 2022. Foi unha vez publicada no Boletín Oficial da Provincia (BOP) a aprobación definitiva dos mesmos, ademais do cadro de persoal.
Previamente as contas foran aprobadas con carácter inicial polo Pleno da Corporación na sesión celebrada o pasado día 7 de xaneiro. Durante o período de exposición pública presentouse unha única alegación que foi desestimada por unanimidade dos tres grupos municipais no Pleno.
Os presupostos do novo exercicio económico están equilibrados en gastos e ingresos e ascenden a 8.618.000 euros, sendo o reflexo das liñas prioritarias para o goberno local:
- blindaxe dos servizos sociais (1.775.000 euros, o que supón o 20 % do total)
- esforzo investidor (1.240.000 euros para a mellora de infraestruturas municipais)
- apoio ao asociacionismo e aos estudantes e a conxelación de impostos e taxas municipais (IBI, recollida de residuos sólidos urbanos, etc.), manténdose nos tipos mínimos que permite a lei
Conceden dúas licencias para vivendas unifamiliares
Na sesión ordinaria da Xunta de Goberno Local celebrada onte foron concedidas dúas licencias urbanísticas para a construción de vivendas unifamiliares. Unha delas levantarase no núcleo urbano da Laracha e a outra, no lugar das Rañeiras da parroquia de Lestón.
Dinamizar a lectura
Acordouse, ademáis, solicitar a participación na convocatoria de subvencións impulsada pola Consellería de Cultura, Educación e Universidade. As mesmas están orientadas á programación de actividades de dinamización da lectura nas bibliotecas municipais. Así, o Concello pretende organizar diversas iniciativas no marco do programa Ler conta moito que se desenvolvan nas bibliotecas municipais da Laracha, Paiosaco e Caión. A iniciativa permite ofertar unha ampla variedade de propostas culturais e educativas especialmente dirixidas ao público infantil e familiar.
