O proxecto das obras está valorado en 74.000 euros e contempla intervencións en Montemaior, Soandres, Cabovilaño e Lemaio
O proxecto que suporá obras de mellora de estradas municipais en tramos de acceso a fincas agrarias xa está en marcha. As actuacións serán nas parroquias de Montemaior, Soandres, Cabovilaño e Lemaio.
Contémplanse catro intervencións diferenciadas, das cales unha xa está finalizada (vía de San Fins de Arriba en dirección á estrada CP-2404 na parroquia de Montemaior).
Outras dúas están a ser executadas actualmente de xeito simultáneo. Localízanse nun camiño de Tuixe de Abaixo (parroquia de Cabovilaño) e na vía que comunica ese mesmo lugar con A Costa (discorre polas parroquias de Cabovilaño e Lemaio). Precisamente á última estrada acudiron o alcalde, José Manuel López Varela, e os concelleiros Jesús Souto e Pablo Cambón, para interesarse polo desenvolvemento dos traballos. A última intervención, que se executará a continuación, afecta á estrada do núcleo de A Ferreira, en territorio das parroquias de Montemaior e Soandres.
En total invístense 74.000 euros a cofinanciar entre o Concello e a Xunta de Galicia a través da Axencia Galega de Desenvolvemento Rural no marco do Plan de mellora de camiños municipais de acceso a parcelas agrícolas.
