Pola seguridade aumentarase a anchura da plataforma da calzada
Están en marcha as obras dirixidas a reforzar a seguridade viaria na rúa San Martiño, situada en Paiosaco e que dá acceso ao núcleo da Agrela. A fase inicial da intervención consiste na instalación da canalización soterrada da rede eléctrica ao longo duns 150 metros. A continuación eliminarase catro postes do actual tendido aéreo que se atopan nesa zona.
Isto posibilitará dispoñer dun maior espazo na calzada. Pasará de ter unha anchura media da plataforma de catro metros ata alcanzar unha amplitude máxima de sete metros e medio. Deste xeito reforzarase a seguridade viaria tanto para a circulación rodada como para os peóns desta zona do Concello da Laracha.
O proxecto supón un investimento de 35.000 euros a financiar integramente con fondos municipais. O alcalde, José Manuel López Varela, e os concelleiros Jesús Souto e Ramiro Bello visitaron a rúa San Martiño para supervisar o desenvolvemento dos traballos.
