Implicarán, a partir de mañá, o corte temporal á circulación dos vehículos entre O Cancelo de Abaixo e Arén
As obras de execución de mellora da estrada que discorre polos núcleos do Chamusco e Arén, en Cabovilaño, están xa en marcha. O alcalde da Laracha, José Manuel López Varela, e o concelleiro de Obras Públicas, Jesús Souto, desprazáronse ata o lugar das actuacións. Alí reuniéronse co director de obra e interesarse polo desenvolvemento dos primeiros traballos.
Para posibilitar a execución será preciso proceder ao corte temporal á circulación da vía desde O Cancelo de Abaixo e ata Arén. Farase a partir de mañá e durante varios días, permitíndose unicamente o acceso ás vivendas. As estradas alternativas serán a AC-552 e as do parque empresarial.
Grazas a estas obras aproveitaranse os sobreanchos da calzada resultantes das aliñacións das construcións e peches de parcelas particulares realizados nos últimos anos. Así se gañará máis de un metro de amplitude media. O proxecto tamén inclúe a renovación do pavimento da vía e a sinalización horizontal e vertical. As obras darán resposta ás necesidades que presenta a estrada ante o incremento de tráfico polo seu emprazamento próximo ao polígono industrial. O investimento para o financiamento do proxecto situarase en torno aos 70.000 euros.
