O Concello denuncia o deficiente resultado das obras realizadas pola Deputación da Coruña na estrada A Laracha-A Silva.
O Concello denuncia o deficiente resultado das obras executadas recentemente pola Deputación da Coruña nun tramo da estrada provincial DP-2404 (A Laracha-A Silva) ao seu paso pola parroquia de Montemaior.
A actuación, consistente na reparación de baches e a renovación do pavimento en varios puntos da vía que suman unha distancia total duns dous quilómetros, levouse a cabo empregando gravilla. Ese material é inadecuado para unha intervención desas carácterísticas considerando as condicións, amplitude e tráfico que soporta a estrada tanto de turismos como de vehículos pesados.
Esta circunstancia xa provocou queixas por parte da veciñanza, trasladando ao Concello o malestar cidadán -en especial, de persoas residentes nos núcleos de Sabaceda, O Lorteiro, A Fieira, Zanfoga e A Lagarteira- os problemas de seguridade que están a supoñer as actuais condicións da calzada a peóns e vehículos pola menor adherencia á calzada que pode provocar saídas de vía, o levantamento de po que reduce a visibilidade e os danos do impacto da gravilla que xa se rexistraron sobre as carrocerías e as lunas dos coches.
O Concello lamenta profundamente que a Deputación da Coruña optase por unha intervención de insuficiente calidade cuxo resultado, en lugar de mellorar o pavimento, supón agravar os problemas de seguridade nesta vía vertebradora das comunicacións rodadas no termo municipal ao enlazar A Laracha con A Silva e, a continuación, con Ordes e Santiago de Compostela.
