O Concello está a desenvolver obras e proxectos en distintos puntos do municipio
O Concello da Laracha realiza obras para mellorar o municipio. A intervención máis ampla realizouse en Erboedo, na ampla explanada de titularidade municipal situada nas inmediacións do Igrexario e xunto ao centro sociocultural desa parroquia. O ámbito –que tamén é empregado como campo da festa- é o lugar onde estacionan os vehículos especialmente durante as xornadas nas que se ofician actos relixiosos na igrexa parroquial de Santa María de Erboedo. O marcado das 75 prazas de aparcamento –tres delas reservadas para persoas con mobilidade reducida- permite reorganizar o espazo para ofrecer aos usuarios un mellor e máis óptimo aproveitamento do espazo dispoñible, facilitándose deste xeito a entrada e saída dos vehículos.
Os outros traballos de pintura centráronse no remarcado de pasos para peóns, sinalización horizontal, zonas excluídas ao tráfico, prazas de aparcamento e zona amarela en diversas localizacións do municipio. No núcleo urbano da Laracha actuouse na Avenida Manuel Fraga e nas rúas Eusebio Bértoa, Arxentina, Suíza, Santa Lucía, Río Bradoso e José Loureiro. En Paiosaco a intervención centrouse na Avenida Bergantiños. E en Cabovilaño traballouse na urbanización Monte Claro.
Ademais, no interior do CEIPs Otero Pedrayo e Alfredo Brañas realizouse o pintado dos itinerarios peonís establecidos como medida de prevención ante o coronavirus, incluíndo marcas viarias, símbolos e pictogramas.
Máis intervencións
O Concello da Laracha realizó unha intervención na rúa Ramón Cabanillas (antiga 3ª travesía López Astray) do casco urbano da Laracha. Incluíu a renovación do firme nos seus 134 metros de lonxitude ao longo dos que presenta unha anchura media de 5,5 metros. Por tanto, o ámbito da actuación, consistente na aplicación dunha capa de aglomerado asfáltico en quente, alcanzou os 737 metros cadrados. O proxecto tamén contemplou a mellora da rede de recollida de augas pluviais.
Proxecto formalizado
O alcalde, José Manuel López Varela, e o representante da empresa Construcciones Ponciano Nieto S.L. formalizaron o contrato de execución do proxecto de urbanización da prolongación da Avenida Manuel Fraga ata a rúa Maruja Mallo, no núcleo da Laracha.
A actuación, que está valorada en preto de 245.000 euros, forma parte do plan especial de equipamentos educativos do IES Agra de Leborís. Inclúe a pavimentación da calzada, construción de beirarrúas, espazo de aparcamento e axardinamento. Tamén a creación das redes de saneamento e abastecemento, canalización soterrada de rede eléctrica, telecomunicacións. Inclú e a iluminación pública e sinalización horizontal e vertical, estando contemplado, entre outras medidas, un paso de peóns elevado.
Con esta intervención crearase unha circunvalación que conectará directamente a estrada A Laracha-A Silva (DP-2404) coa estrada A Laracha-Soandres (DP-1913) pola Avenida Doutor López Astray. A obra tamén permitirá habilitar un novo acceso cara o instituto –pola parte posterior do centro- para os autobuses de transporte escolar.
