O proxecto na estrada foi cofinanciado polo Concello e a Xunta de Galicia dentro do Plan marco de camiños municipais de acceso a parcelas agrícolas
Días pasados finalizaron as obras de execución do proxecto de mellora da estrada entre Santa Margarida (Montemaior) e A Silva (límite co Cerceda). A actuación forma parte do Plan marco de mellora de camiños municipais de acceso a parcelas agrícolas. Este está impulsado pola Consellería do Medio Rural a través do Programa de Desenvolvemento Rural (PDR) e cofinanciado polo Fondo Europeo Agrícola de Desenvolvemento Rural (Feader).
A intervención consiste na completa renovación do firme desta vía, que comunica as as fincas agrícolas desa zona coa estrada DP-2404 que dirixe á Silva. Tamén dá acceso ao termo municipal de Carballo por Paradela. Presenta unha lonxitude de 1.250 metros e unha anchura media superior aos cinco metros. Dicir, ademáis, que se está a mellor tanto a plataforma de rodadura dos vehículos como a drenaxe da estrada para reforzar a seguridade.
José Manuel López Varela, alcalde da Laracha e o edil responsable da área de Obras Públicas, Jesús Souto, desprazáronse ao lugar da intervención para coñecer o desenvolvemento dos traballos. O orzamento do proxecto ascende a 65.434,08 euros, dos cales a Xunta de Galicia achega 53.961 euros. O Concello asume a parte restante con fondos propios municipais.
Ampliación dos equipamentos do CEIP Otero Pedrayo
Na última sesión ordinaria da Xunta de Goberno Local foi aprobado con carácter inicial o expediente de expropiación dos terreos afectados pola primeira fase de ampliación dos equipamentos do CEIP Otero Pedrayo.
O Concello investirá 43.7078,96 euros na adquisición dos 2.696 metros cadrados de superficie –repartidos en catorce parcelas- que están afectados polo proxecto de mellora dos accesos. Continuando cos trámites administrativos, será publicado no Diario Oficial de Galicia (DOG) e estará un mes en exposición pública antes da definitiva aprobación. Así mesmo, notificarase aos propietarios dos terreos e abrirase o período de alegacións ao xustiprezo.
Unha vez rematado o procedemento de expropiación, o Concello estará en disposición de iniciar a contratación do proxecto. Consiste na ampliación da estrada entre Bos Aires e As Calzadas e dá continuidade á mellora xa realizada entre O Pereiro e As Calzadas. O ancheamento da vía permitirá dispoñer de máis espazo para facilitar a circulación en ambos sentidos –especialmente importante para os autobuses do transporte escolar-. Tamén habilitar prazas de estacionamento e crear unha senda peonil para reforzar a seguridade tamén das persoas que acoden a pé ao centro de ensino e ás súas inmediacións.
O proxecto está valorado en 245.000 euros, que xa están consignados polo Concello da Laracha no orzamento e que proceden integramente de fondos propios municipais. Salientar tamén que na Xunta de Goberno Local deuse a licenza de primeira ocupación para unha nave industrial situada no parque empresarial.
