A actuación en Cabovilaño afecta aos núcleos de A Braña, A Cacharra, A Fraga e A Teixoeira
O Concello da Laracha ten en fase de execución un amplo proxecto na parroquia de Cabovilaño. Está dirixido a ampliar a rede de saneamento e mellorar as condicións da estrada entre os núcleos de A Braña, A Fraga, A Cacharra e A Teixoeira. Actualmente, avanza a intervención consistente na instalación das tubaxes de saneamento para ampliar a cobertura deste servizo. O novo tramo conectará coa rede xa existente en A Cacharra. O alcalde, José Manuel López Varela, e os concelleiros Jesús Souto e Patricia Bello, visitaron aos traballadores no punto no que se executan as obras.
A continuación, actuarase na mellora da estrada sobre a que discorren as tubaxes a instalar. A intervención contempla a limpeza das cunetas e a nova pavimentación con aglomerado asfáltico. É un tramo de oitocentos metros de lonxitude. O investimento total situarase en torno aos 80.000 euros.
Intervencións en centros de ensino
Por outra banda, o alcalde José Manuel López Varela, e a edil responsable da área de Ensino, Patricia Bello, reuníronse hoxe co xefe territorial de educación, Indalecio Cabana. O propósito foi de analizar as intervencións prioritarias para levar a cabo nos próximos meses nos centros de ensino do termo municipal.
No caso do IES Agra de Leborís requírese a apertura dos novos accesos pola parte posterior do centro. O Concello está a converter ese ámbito nun novo punto de referencia para os veciños dentro do núcleo urbano da Laracha co desenvolvemento de xeito simultáneo de varios proxectos complementarios entre si. Trátase da apertura dunha nova estrada que conecta directamente as avenidas Manuel Fraga e Doutor López Astray , e a creación de pistas polideportivas descubertas. Tamén un parque de patinaxe. Isto permitirá habilitar acceso cara o instituto para os autobuses do transporte escolar. Ademáis, incorporar durante o horario lectivo os novos equipamentos deportivos para uso do centro educativo. Para iso é necesario habilitar no peche perimetral os accesos correspondentes.
No CEIP de Caión, tratouse a necesidade de completar a mellora do peche perimetral do colexio no último tramo despois da rehabilitación realizada. Ademais estudáronse outras intervención susceptibles de realizarse xa nos propios edificios dos centros educativos. O propósito é mellorar as súas condicións e aumentar a comodidade do alumnado, profesorado e resto do persoal. Tamén se analizaron cuestións relativas ao transporte escolar.
