Os obradoiros gratuitos realizaranse os sábados 11 e 18 de setembro e van dirixidos a nenos de entre 6 e 12 anos de idade
O Concello da Laracha organizará dous obradoiros infantís no Centro de Interpretación dos Muíños de Auga da Costa da Morte de Golmar. Terán lugar os sábados 11 e 18 de setembro, ambos de 10:30 a 13:30 horas e van dirixidos a nenos de entre 6 e 12 anos de idade. Ver programa completo nas imáxenes de abaixo.
O primeiro dos obradoiros titúlase Facendo pan. Muíños e cereais e constará de dúas fases:
- Divulgativa: consistirá nunha visita comentada polo museo para coñecer a historia, xeografía, arquitectura, tradición e economía da época. Tamén o funcionamento dos seus diferentes mecanismos, incluíndo o visionado dun vídeo explicativo.
- Participativa: cada neno amasará e preparará o seu propio pan seguindo a receita que se explicará previamente. A continuación, cocerase no forno da Panadería Antonio, situada xunto ao museo. Finalmente explicaranse as diferentes partes do pan (codia, miolo, corrosco, codela, etc.).
O obradoiro do sábado 18 denomínase Pirámide ecolóxica. Muíños e natureza. Neste caso a metodoloxía será un xogo no que os nenos montarán a estrutura dunha pirámide colocando as diferentes pezas dun xeito que non rompan o equilibrio natural, amosándose como desde a base e ata a cúspide van aparecendo os distintos elementos que conforman a vida. Aproveitarase para repasar como son en galego os nomes dos diferentes animais e plantas.
As inscricións son gratuítas e abriranse mañá, venres 3 de setembro. Será preciso cubrir o formulario que estará dispoñible na web municipal ou ben acudir ao Concello para anotarse.
O Centro de Interpretación dos Muíños de Auga de Golmar conta co distintivo de centro azul polo seu labor de educación ambiental que se pon de manifesto coa organización deste tipo de obradoiros. Ademais, o museo está aberto ao público os venres o os sábados en horario de 10:00 a 14:00 horas. Tamén poden concertarse visitas de grupos en calquera outra data.
