A especialidade de conservación e mellora de montes do obradoiro, centra a súa actividade na área recreativa de Gabenlle e na zona verde do parque empresarial
A especialidade de carpintería e moble do Obradoiro de Emprego A Laracha VI comezou a acometer as labores previstas no entorno do Centro de Interpretación dos Muíños de Auga da Costa da Morte de Golmar. Consisten na renovación do peche perimetral, da tarima de madeira e do mobiliario urbano (bancos e papeleiras).
A intervención, a primeira que se realiza sobre o terreo, é a parte final dun labor que comezou coa fase formativa. Logo continuou co traballo no taller para a fabricación das estruturas de madeira e conclúe agora coa colocación das mesmas. O alcalde José Manuel López Varela, e a concelleira de Emprego, Rocío López, acudiron ata Golmar para coñecer o resultado desas actuacións. Os alumnos traballadores, baixo a supervisión do persoal docente, elaboraron tamén o mobiliario urbano que se instalará en próximas datas en puntos do termo municipal para renovar os equipamentos existentes.
Cabe lembrar que o Obradoiro de Emprego A Laracha VI conta con outra especialidade, a de actividades auxiliares en conservación e mellora de montes. Centra as súas intervencións na posta en valor da área recreativa de Gabenlle e na zona verde do parque empresarial.
En total son vinte e cinco persoas as que forman parte do programa. Os alumnos traballadores, están vinculados ao Concello cun contrato de formación, ademais de acceder a unha remuneración económica durante os nove meses de duración. Logo recibirán o certificado de profesionalidade que acreditará a súa formación mellorando a súa empregabilidade e inserción no mercado laboral.
