Os proxectos para Laracha centraranse na posta en valor de zonas verdes e espazos públicos
O Concello da Laracha continúa actuando no desenvolvemento de políticas activas de emprego. Ofrece á veciñanza oportunidades para mellorar a súa empregabilidade e formarse en sectores con demanda de traballadores cualificados.
Unha das novas iniciativas que se porá en marcha será o Obradoiro de Emprego A Laracha VI. O sexto programa dual de formación e emprego que organizará en solitario o Concello co apoio da Xunta de Galicia. A resolución concede a achega económica necesaria para o desenvolvemento do programa ao abeiro da convocatoria de axudas e subvencións para os obradoiros duais de emprego da Comunidade Autónoma de Galicia (DOG núm. 14, do 22 de xaneiro de 2020).
O Obradoiro de Emprego A Laracha VI terá unha duración de nove meses. Constará de dúas especialidades con dez alumnos-traballadores en cada unha delas. Ademais, o equipo directivo, formativo e administrativo.
Especialidades
Unha das especialidades será a de actividades auxiliares en conservación e mellora de montes. Os proxectos que realizarán consistirán na posta en valor de zonas verdes públicas repoboándoas de árbores e vexetación autóctona. Tamén, dotándoas con mobiliario urbano co propósito de mellorar as súas condicións para promover o seu uso e disfrute. As principais intervencións serán na zona situada nas inmediacións do parque empresarial e a área recreativa de Gabenlle.
A outra especialidade será a de traballos de carpintería e moble. Encargarase da mellora do paseo fluvial do Anllóns –dando continuidade ao proxecto que está a executar actualmente o Obradoiro de Emprego A Laracha V-. Tamén da renovación do mobiliario urbano e do peche perimetral da parcela do Centro de Interpretación dos Muíños de Auga da Costa da Morte de Golmar.
Procesos selectivos
En próximas datas o Concello iniciará os procesos selectivos. As persoas que desexen optar a un dos postos de alumnos-traballadores deben estar empadroadas no termo municipal da Laracha. Ademáis, atoparse en idade laboral e estar inscritas como demandantes de emprego. Os vinte alumnos traballadores, ademais de acceder a unha remuneración económica, ao completar a especialidade correspondente recibirán o certificado de profesionalidade. Desta maneira acreditará a súa formación, cualificación e competencia para exercer a profesión, mellorando por tanto a súa empregabilidade.
