A intervención en Cabovilaño forma parte do plan municipal de mantemento e conservación da rede viaria
O Concello da Laracha está acometendo unha actuación no lugar de O Cancelo na parroquia de Cabovilaño, nas inmediacións do parque empresarial. A intervención é parte do plan de mellora, conservación e mantemento en boas condicións das vías de titularidade municipal.
A obra, financiada con fondos municipais, estase a executar sobre un camiño de acceso a vivendas. Inclúe a limpeza integral, o afirmado e a mellora na drenaxe que evitará a acumulación de augas pluviais.
A característica dispersión da poboación que presenta o municipio implica que o Concello da Laracha dispoña dunha ampla rede viaria que supera os 600 quilómetros de estradas. Elas percorren o termo municipal para comunicar os máis de trescentos núcleos de poboación existentes. O seu mantemento en bo estado de conservación é unha das cuestións prioritarias para goberno local.
O alcalde, José Manuel López Varela, e o concelleiro de Urbanismo e Obras Públicas, Jesús Souto, visitaron o lugar das obras para comprobar o correcto desenvolvemento das actuacións previstas.
Licenza urbanística
O Concello recibiu a solicitude de licenza urbanística para a construción dun edificio de 19 vivendas para uso residencial na rúa Arxentina da capital municipal. Trátase da primeira promoción de vivendas en bloque que se presenta desde o ano 2008 para obter a correspondente licenza.
O proxecto é impulsado por un promotor local. Pretende levantar o inmoble nunha parcela que presenta unha superficie de máis de 1.100 metros cadrados. O edificio constaría de planta soto (garaxes e rochos), planta baixa e tres plantas altas máis o aproveitamento do baixo cuberta.
No termo municipal da Laracha estase a rexistrar desde hai anos un continuo e progresivo incremento de poboación tanto nas zonas urbanas como en determinados núcleos rurais. O xurdimento de iniciativas como o proxecto de construción deste edificio na vila da Laracha poñen de manifesto a existencia de demanda de vivenda.
