Os parques, de similares características, contan con tres unidades de xogos, pavimento de caucho e peche perimetral
O Concello está a crear dous novos parques infantís no Igrexario de Erboedo e no campo da festa de parroquia de Soandres. Os equipamentos, que se prevé estean listos para abrir ao público nos próximos días, son de similares características. Contan con tres unidades de xogos -columpios, balancín e tobogán-, cun pavimento de caucho que reforza a seguridade dos usuarios e cun valado de madeira como peche perimetral.
O alcalde, José Manuel López Varela, o concelleiro de Obras, Jesús Souto, e a edil de Educación e Xuventude, Patricia Bello, achegáronse ata ambos parques infantís para coñecer o resultado das actuacións.
Espazos modernos e seguros
O Concello inviste preto de 30.000 euros procedentes integramente de fondos municipais co propósito de que tanto residentes nas zonas urbanas como en núcleos rurais, poidan dispoñer de espazos de esparexemento modernos. Tamén, para fomentar a convivencia e potenciar as actividades saudables.
Recentemente abriuse ao público o segundo parque infantil da praza O Recreo da Laracha. Previamente habilitárase un novo en Lemaio e melloráranse os situados no parque Maximino Canedo, nos tres colexios e no campo da feira de Paiosaco.
