O Concello da Laracha finaliza o local no campo de fútbol municipal A Porta Santa de Paiosaco
O alcalde da Laracha, José Manuel López Varela, entregou ao presidente da Unión Deportiva Paiosaco, Carlos García, as chaves do novo local no campo de fútbol municipal A Porta Santa. No acto tamén participaron o concelleiro Ramiro Bello, a secretaria do club Susana Regueira e o responsable da empresa que executou o proxecto. O investimento superou os 17.000 euros financiados integramente con fondos propios municipais.
A actuación desenvolveuse dando continuidade ao edificio de vestiarios xa existente. Trátase dun novo local cuberto dunha superficie útil aproximada de 30 metros cadrados. Será empregado como sala de masaxes e fisioterapia. Deste xeito auméntase a cobertura en equipamentos do campo de fútbol. Tamén conta cun local social, sala de reunións, catro vestiarios para equipos e dous para árbitros, zona de lavandería e almacén. Ademais ten bancadas que na súa parte baixa albergan outro amplo espazo de almacenamento de material.
Este proxecto levouse a cabo polo Concello de acordo ás necesidades que presenta a U.D. Paiosaco. O club é o principal usuario das instalacións. Alí desenvolven os adestramentos e os partidos como local os equipos (once na temporada actual) cos que conta a entidade en todas súas categorías.
