Os labores no paseo fluvial son limpeza, reparación e substitución de táboas, entre outras tarefas
Os alumnos traballadores e docente da especialidade de carpintería do Obradoiro de emprego A Laracha VI realizan melloras no paseo fluvial do Anllóns. Así, continúan desenvolvendo a formación práctica e teórica previstas neste programa dual. A iniciativa está oganizada polo Concello da Laracha coa colaboración da Consellería de Emprego e Igualdade da Xunta de Galicia.
Están a executar as obras programadas, fase na que aplican a aprendizaxe adquirida tanto nas aulas durante as clases teóricas como no taller. Os traballos comezaron coa limpeza e reparación de táboas danadas na pasarela de madeira de máis de dous quilómetros entre Gabenlle e O Formigueiro. Agora, as intervencións concéntranse na zona máis próxima á entrada desde Gabenlle. Alí estase a aplicar un verniz antideslizante. Tamén están a substituír as papeleiras por outras novas de madeira e fabricadas polos propios alumnos no taller.
O alcalde, José Manuel López Varela, e os concelleiros Martínez Barbeito e Rocío López acudiron ata o paseo fluvial para interesarse polo traballos. Forman parte deste programa dual de formación e emprego un total de vinte e cinco persoas. Vinte son os alumnos traballadores vinculados ao Concello cun contrato de formación. Outras cinco persoas son do equipo directivo, formativo e administrativo.
