Gonzalo Trenor, informou nunha visita ao CEIP Alfredo Brañas que o orzamento será de 170 mil euros
O delegado da Xunta na Coruña, Gonzalo Trenor, acompañado polo alcalde da Laracha, José Manuel López, informou nunha visita ao CEIP Alfredo Brañas que a Xunta de Galicia vai acometer a renovación das carpinterías. O investimento de máis de 170.000 euros suporá adaptar a infraestrutura ás esixencias construtivas establecidas no Plan de Nova Arquitectura Pedagóxica de Galicia.
A actuación ten un prazo de execución de dous meses. Trátase da susbtitución das carpinterías exteriores dos dous edificios, o administrativo e o aulario, por novas de rotura de ponte térmica e vidros cun mellor comportamiento enerxético. Tamén, a instalación dun sistema de illamento térmico polo exterior (SATE) dos cerramentos do edificio administrativo sobre os que non se ten intervido anteriormente.
Este investimento no CEIP Alfredo Brañas, únese ás obras proxectadas pola Consellería de Cultura, Educación e Universidade que contemplan 35 actuacións. Todas elas nos centros educativos de Bergantiños-Costa da Morte cun investimento global de 2,8 millóns de euros.
