A actuación de mellora inclúe o acceso ao Santuario dos Milagres de Caión
Están en marcha as obras do proxecto de mellora da estrada de Caión que parte da CP-1909. A actuación discorre xunto ao santuario dos Milagres e atravesa o núcleo de O Outeiro. Ao estar incluída no Plan de Infraestruturas Rurais da Consellería do Medio Rural, o proxecto será financiado integramente pola Xunta de Galicia.
A iniciatiova contempla a ampliación da anchura actual da zona de rodadura dos vehículos aproveitando o espazo na marxe da calzada e a nova pavimentación da vía. En total será acondicionada unha distancia lineal duns 600 metros. Ademais, en dous tramos, reforzarase a seguridade coa colocación de biondas como barreira de protección que eviten posibles caídas de vehículos a distinto nivel.
O alcalde da Laracha, José Manuel López Varela, e o concelleiro de Obras Públicas, Jesús Souto, desprazáronse ata o lugar da mellora. As mesmas se prolongarán durante os próximos días. O orzamento do proxecto alcanza os 45.000 euros.
