As obras na rede viaria afectan aos núcleos de Vilanova, O Campo da Porta, A Painceira, Goxán e Cardois
O Concello da Laracha ten en fase de execución o proxecto de mellora da rede viaria que afecta a estradas de cinco parroquias diferentes. Unha das intervencións localízase no lugar de Vilanova, na parroquia de Vilaño. Consiste na pavimentación dun tramo da estrada que presentaba un firme en terra. Tamén, un acondicionamento dos sobreanchos para o aparcamento de vehículos. A ese lugar acudiron o alcalde, José Manuel López Varela, e os concelleiros Jesús Souto e Rocío López, para comprobar o resultado dos traballos que se están a acometer.
O proxecto tamén inclúe actuacións de mellora da rede viaria no Campo da Porta (parroquia de Lendo), A Painceira (Coiro), Goxán (Caión) e Cardois (Cabovilaño). Ademais da renovación da capa de rodadura, contémplase a correspondente sinalización vertical e horizontal para reforzar a seguridade viaria. O investimento total alcanza os 72.000 euros.
