O Concello promove «A Laracha activa e o mar de Caión» que contempla actuacións de sinalización de roteiros, actividades medioambientais e creación dunha pictoaplicación
O Grupo de Acción Local do sector Pesqueiro (GALP) Costa da Morte vén de comunicar ao Concello a concesión dunha axuda para o financiamento de «A Laracha activa e o mar de Caión» ao abeiro da Estratexia de Desenvolvemento Local Participativo (EDLP). A iniciativa está impulsada pola entidade dependente da Consellería do Mar da Xunta de Galicia.
O proxecto promovido polo Concello ten por obxectivo principal reforzar os valores ambientais e patrimoniais no litoral caionés. Para iso propóñense unha serie de iniciativas dirixidas a mellorar a oferta turística e educativa vinculando e compatibilizando a práctica da actividade física. Pero tamén, ao descubrimento dos espazos marítimos e costeiros centrándose nos valores medioambientais, paisaxísticos e históricos. A iniciativa presenta un orzamento total de 71.500 euros.
Cinco actuacións diferenciadas
Dúas consisten na sinalización de roteiros para realizar a pé. Un será o sendeiro A Laracha-Caión que une a capital municipal coa vila costeira nun percorrido de doce quilómetros. Se colocarán sinais direccionais e paneis interpretativos con información sobre os principais puntos de interese patrimonial e medioambiental. O outro lugar de intervención é o Sendeiro de Saldoiro, o tramo do paseo marítimo de Caión que parte da Praza Eduardo Vila Fano e remata preto do límite co veciño municipio de Carballo. Este espazo conta co distintivo de Sendeiro Azul e forma parte da Rede Natura.
A terceira actuación consiste na posta en marcha dun programa medioambiental que proporá un conxunto de actividades a realizar con diferentes institucións, especialmente educativas. Están dirixidas a visibilizar a costa e o mar como recursos doutras cadeas de valor relacionadas coa economía (turismo, biotecnoloxía, etc). Exemplos disto serían programas de andainas, difusión dos oficios da pesca artesanal e xornadas de educación ambiental nos colexios.
A cuarta liña contempla a creación dunha pictoaplicación dirixida a persoas que presenten trastornos de comunicación na linguaxe oral e que lles facilitará a comprensión do territorio costeiro e do mar da Costa da Morte.
Por último, inclúese a asistencia técnica por parte de persoal especializado no sector turístico que prestará asesoramento e coordinación. Ademáis, levará a cabo un seguimento de todas as actuacións que se desenvolvan no marco deste proxecto.
