Actualmente as brigadas medioambientais centran os traballos de limpeza desde Gabenlle ata O Formigueiro
Todos os anos por estas datas o Concello da Laracha acomete actuacións de limpeza dos entornos fluviais. As levan a cabo as brigadas medioambientais municipais. Os labores consisten na eliminación da maleza nas inmediacións do río para facilitar o tránsito a pé e a limpeza integral do lixo e materia vexetal. Faise cos obxectivos fundamentais de poñer en valor estas áreas de especial riqueza natural e paisaxística da zona interior da Laracha.
As cuadrillas municipais nestes momentos están centrando as súas actuacións no río Anllóns ao longo do paseo fluvial, desde Gabenlle ata o Formigueiro. Nese lugar mantiveron un encontro co alcalde, José Manuel López Varela, e o tenente alcalde, José Ramón Martínez Barbeito, que visitaron aos traballadores. A continuación levarán a cabo intervencións de similares características noutros puntos do Anllóns. Tamén, nos seus afluentes e tamén nos ríos Vilán, Acheiro e Bradoso.
O persoal das brigadas medioambientais municipais foi contratado en colaboración coa Deputación da Coruña no marco do programa de integración laboral PEL-Concellos Reactiva 2021. Por tanto, estase alcanzando o dobre obxectivo de realizar actuacións de interese xeral para a veciñanza e, ao mesmo tempo, crear postos de traballo.
O patrimonio natural que conforman as concas dos ríos laracheses son lugares que destacan pola súa beleza paisaxística e biodiversidade e que en, moitos casos, son descoñecidos mesmo polas persoas residentes nas proximidades desas zona. Desde o Concello da Laracha animamos aos nosos veciños a descubrir estes entornos que ofrecen os ríos e que, coas intervencións municipais que se están levando a cabo nestes momentos, son de cómodo acceso a pé.
Selección auxiliar administrativo
Por outra banda, o Concello ten en marcha o proceso de selección dun auxiliar administrativo que será incorporado como funcionario interino. Unha vez rematado o prazo, son 117 as persoas inscritas para formar parte do procedemento. A listaxe provisional de admitidos e excluídos pode consultarse na web municipal, na sede electrónica e tamén no taboleiro de anuncios do Concello.
A selección farase polo sistema de concurso-oposición libre. Na fase de concurso valoraranse as titulacións académicas, os curso formativos dos aspirantes e a experiencia profesional. A fase de oposición consistirá na realización dunha proba tipo test e dun exercicio práctico. Ademais, os aspirantes que non acrediten estar en posesión do título Celga 3 ou equivalente, deberán superar a correspondente proba de coñecemento da lingua galega.
