A especialidade de pintura do obradoiro de emprego comenzó a intervención no campo de fútbol
Onte comezaron os traballos de mantemento da cuberta das gradas do campo de fútbol municipal A Porta Santa de Paiosaco. A mellora está a facela o alumnado traballador da especialidade de pintura industrial en construción do Obradoiro de Emprego A Laracha VII.
As intervencións consisten no lixado da superficie da estrutura metálica para a eliminación da pintura e do óxido. A continuación, aplicarase imprimación epoxi e un esmalte de poliuretano de dous compoñentes.
Para poder desenvolver estes traballos en altura o Concello puxo a disposición catro plataformas articuladas. Deste xeito os dez alumnos traballadores está a poñer en práctica a formación adquirida previamente no curso sobre o emprego de plataformas elevadoras móbiles.
O alcalde, José Manuel López Varela, e os concelleiros Jesús Souto e Rocío López acudiron ás instalacións do campo de fútbol. Reuniéronse coa directora, mestre e alumnado para interesarse polas actuacións que se están a realizar.
Prácticas do programa dual
Paralelamente, as alumnas traballadoras da especialidade Atención sociosanitaria a persoas dependentes en institucións sociais, continúan realizando súas prácticas. As mesmas, desenvólvense en centros residenciais da Laracha, Arteixo e A Coruña. Estanse a levar a cabo por quendas, compatibilizando cun día de seguimento semanal da titora e unha docente da especialidade.
O Obradoiro de Emprego A Laracha VII está en marcha desde finais de outubro e ten unha duración de nove meses. Conta con 20 alumnos-traballadores –dez por cada especialidade- e un equipo directivo. Trátase do sétimo programa dual de formación e emprego que organiza o Concello da Laracha coa Xunta de Galicia a través da Consellería de Emprego e Igualdade. O orzamento alcanza os 347.000 que se invisten co dobre obxectivo. Por unha banda, formar a persoas que se atopan en situación de desemprego e, tamén, realizar actuacións de interese xeral para a cidadanía.
