O servizo de información turística abre de martes a sábado, de mañá e de tarde ata setembro. Ademáis, avanzan as obras do centro social na zona da Insua
A partir de hoxe o Concello da Laracha volve a prestar servizo de información turística na oficina situada na antiga casa reitoral de Caión. Persoal técnico especializado na materia, estará a disposición dos usuarios para informar sobre os principais atractivos turísticos do noso municipio. Tamén doutros puntos da Costa da Morte e de Galicia.
O horario de apertura ao público será de martes a sábado de 10:00 a 14:00 horas pola mañá e de 15:00 a 19:00 horas pola tarde. A oficina de información turística funcionará en Caión durante os meses de agosto e setembro. Despois da temporada de verán reubicarase na capital municipal.
Insua: centro sociocomunitario
Por outra banda, o alcalde José Manuel López Varela e o concelleiro de Urbanismo e Obras Públicas, Jesús Souto, visitaron en Caión as obras de construción do centro sociocomunitario na zona da Insua. Os membros do goberno local puideron coñecer in situ o resultado do desenvolvemento das primeiras actuacións no interior do edificio. Fixerono xunto a dirección do proxecto e a responsables da empresa que está a executar as obras de construción.
Na oportunidade, viron as divisións interiores, colocación do solo, carpintería metálica e de madeira, fontanería, electricidade, climatización, etc. Esta fase das obras prolongarase durante as próximas semanas. Na parte exterior, a estrutura xa está rematada, o que permite contemplar a singularidade e a envergadura da edificación. Cabe lembrar que a primeira fase, a cimentación, fora especialmente laboriosa pola dureza do terreo sobre o que se asenta o inmoble. A existencia do centro comunitario na zona da Insua permitirá programar iniciativas de interese xeral en Caión nunhas instalacións modernas, amplas e cómodas
O centro comunitario de Caión contará con 882 metros cadrados de superficie repartidos entre o soto, a planta baixa e o primeiro andar. Será un edificio de vocación integradora dado que disporá de aulas polivalentes, salas temáticas e tamén un espazo administrativo ao que se trasladará a Confraría de Pescadores.
O proxecto de construción está valorado en 1,2 millóns de euros -cóntase co cofinanciamento de Xunta de Galicia-, aos que hai que engadir outros 104.000 euros que o Concello ten comprometidos para dotar ao inmoble co equipamento necesario para a súa posta en marcha.
