Segundo os datos recollidos no padrón municipal de habitantes, A Laracha conta con 188 residentes máis que hai un ano
A día de hoxe no Concello da Laracha hai 11.606 habitantes no termo municipal. O que supón un incremento de 188 con respecto á cifra rexistrada hai algo máis de un ano. Isto foi o 14 de marzo de 2020, cando se declarou o primeiro estado de alarma debido á pandemia do coronavirus. Desde esa data rexistráronse 491 altas (409 por cambio de residencia e 69 por nacementos) e 303 baixas (192 por cambio de residencia e 94 por defuncións).
Desa cifra total, o 50,80 % son mulleres (5.896) e o 49,20 % son varóns (5.710). Na pirámide poboacional reflíctese que a franxa de idade con maior número de habitantes é a que vai dos 40 aos 49 anos, con 2.076 persoas. Ademais, hai 851 nenos menores de 10 anos de idade e soamente 4 persoas que superan o século de vida (tres mulleres e un varón).
Por parroquias, as catro que contan con maior número de habitantes son Torás (4.061), Lestón (1.370), Cabovilaño (1.139) e Caión (849). Salientar, tamén, que entre a poboación larachesa hai 332 habitantes procedentes de 37 países estranxeiros. A cabeza Marrocos (69 persoas), Portugal (50), Brasil (27) e Italia (16).
Algo menos para o INE
As cifras do padrón municipal de habitantes presentan certas diferenzas no cómputo con respecto ás do Instituto Nacional de Estadística (INE). O último dato oficial deste organismo data de xaneiro de 2020 que situa a poboación larachesa en 11.406 habitantes. Previsiblemente a actualización recollerá o aumento poboacional rexistrado no padrón no último ano. O continuo e progresivo aumento de poboación que está a rexistrar o Concello da Laracha é un claro indicador da calidade de vida que se ofrece no termo municipal.
