Solicitan a concesión dunha quinta oficina farmacéutica para Paiosaco, Concello da Laracha
Xoán Sande, portavoz do Bng a Laracha, afirma que «hai moitos anos que a veciñanza de Paiosaco vén reivindicando a necesidade dunha oficina de Farmacia na localidade. Tamén persoas que se achegan á feira dominical amosan a súa falta no que é o segundo núcleo de poboación máis importante do Concello».
A Lei 3/2019 de Ordenación Farmacéutica de Galicia establece no seu artigo 32 os módulos de poboación indicando as zonas farmacéuticas semiburbanas. «A día de hoxe coñecemos o dato de que o noso concello xa supera os 11.500 habitantes, aínda que haberá que agardar a oficialidade do mesmo. Tamén se constata un incremento neto poboacional nos últimos cinco anos xa que ao remate do ano 2016 o número de habitantes era de 11.295. Así pois, e de confiarmarse no remate deste ano o dato feito público nos medios de comunicación polo goberno municipal. Este concello cumpriría os requisitos establecidos na vixente Lei de Ordenación Farmacéutica de Galicia para a adxudicación dunha quinta oficina farmacéutica. Loxicamente, deberá instalarse en Paiosaco», finaliza Sande. Por todo isto desde desde o Bng da Laracha propoñen no proximo Pleno da Corporación, instar a Xunta de Galicia a revisión do mapa farmacéutica da Laracha.
