O alcalde dio a benvida aos trece empregados contratados no Concello da Laracha
Hoxe comezan a realizar o seu labor no Concello as trece empregados que foron contratadas no marco do programa de integración laboral PEL-Concellos Reactiva 2021 impulsado pola Deputación da Coruña.
En concreto son nove peóns, dous capataces e dúas traballadoras como persoal de servizos xerais os que se incorporarán á plantilla municipal durante os próximos sete meses. O proceso selectivo realizárase polo sistema de concurso-oposición, valorándose a experiencia profesional e a formación de cada candidato, ademais da realización dunha proba escrita.
Os capataces e peóns formarán cuadrillas de obras e servizos. Encargaranse de actuacións de moi diversas características, como o mantemento de infraestruturas públicas, colocación de sinalización, reparación de beirarrúas e sumidoiros, acondicionamento do terreo para a ubicación de colectores, conservación medioambiental, limpeza viaria, apoio loxístico aos servizos municipais e vixilancia do cumprimento das medidas de prevención ante a covid. O persoal de servizos xerais desenvolverá principalmente traballos de índole administrativa.
O alcalde da Laracha, José Manuel López Varela, e os concelleiros José Ramón Martínez e Rocío López, déronlles a benvida nun acto desenvolvido na Casa da Cultura, no que tamén se trataron cuestións organizativas referidas fundamentalmente ás funcións a desenvolver e aos horarios.
