O Concello da Laracha únese á conmemoración do Día Internacional da Muller Rural con distintas iniciativas
O venres 15 de outubro conmemorase o Día Internacional da Muller Rural. A tal efecto, o Concello da Laracha convoca o concurso de fotografía baixo o título “Día da Muller Rural” no que se repartirán premios por valor de 700 euros para gastar en establecementos do termo municipal.
Poderá participar de forma individual, persoas de calquera idade e nacionalidade que sexa residente no termo municipal da Laracha. O concurso consta de dúas categorías:
- “Mulleres rurais do presente”. Imaxes da vida cotiá das mulleres do rural da Laracha na actualidade que poñan en valor o papel e o traballo desempeñado polas mesmas e a súa contribución ao desenvolvemento local da Laracha.
- “Mulleres rurais do pasado”. O obxectivo é recuperar fotografías antigas que amosen aspectos da vida e o traballo das mulleres rurais da Laracha no pasado.
As persoas que desexen participar teñen que enviar a fotografía e unha breve descrición da mesma. Poden facelo a través do formulario que estará dispoñible desde hoxe na web municipal ou ben de xeito presencial no Edificio Administrativo da Laracha. O prazo finaliza o 25 de outubro.
Outorgaranse tres premios ás tres fotografías de cada categoría que obteñan máis “me gusta” no Facebook do Concello da Laracha dende o día 26 de outubro ata o 1 de novembro ás 10:00 horas. Os premios outorgaranse polo número de “me gustas” sendo o 1ª premio o que máis “me gustas” obteña. Así, os premios de cada categoría son:
- 1º premio: un vale por valor de 200€
- 2º premio: un vale por valor de 100€
- 3º premio: un vale por valor de 50€
Charla: mulleres que inspiran
Para completar a programación polo Día internacional das Mulleres Rurais, o próximo 14 de outubro teremos unha charla sobre emprendemento de mulleres no medio rural. Será a cargo de Verónica Marcos Arrojo, Presidenta da Federación Galega de Mulleres Rurais (Fademur). Abordará a situación actual das mulleres no ámbito rural e presentará casos de éxito de emprendemento de mulleres que poden servir de inspiración. Será as 17:00 horas no Centro de Interpretación dos Muíños de Auga da Costa da Morte (Museo dos Muíños de Golmar).
