Os traballos de desbroce tamén se iniciaron noutras seis parroquias e están en marcha nas parcelas de titularidade municipal
Desde o inicio dos traballos previstos na campaña anual de roce e desbroce de cunetas e parcelas de titularidade municipal, xa son cinco as parroquias nas que os labores concluíron. En outras seis, as intervencións xa están iniciadas.
En concreto, completáronse todos os traballos na rede viaria de Coiro, Lestón, Lendo, Lemaio e Golmar. Actualmente estase a actuar nas estradas das parroquias de Vilaño, Montemaior e Soandres. Xa se iniciaron tamén nas principais vías da rede municipal de Caión, Torás e Cabovilaño. Nos próximos días comezarase nas parroquias de Soutullo e de Erboedo. En total ao longo da campaña, que se prolongará ata o outono, serán acondicionados 300 quilómetros de estradas e 83 quilómetros de camiños forestais.
Traballos simultáneos
Tamén están en marcha as intervencións previstas en parcelas de titularidade municipal que non están incluídas no contrato do servizo de limpeza e mantemento de zonas verdes. Suman unha superficie de 32 hectáreas. Nestes momentos a actividade céntrase na área verde anexa ao parque empresarial. As seguintes intervencións localizaranse prioritariamente nos entornos e espazos públicos de aparcamento próximos ás igrexas parroquiais.
O Concello leva a cabo cada ano esta campaña de desbroce para mellorar a visibilidade dos viandantes e condutores e reforzar a seguridade viaria. Tamén para previr riscos de incendio e manter o ornato público na rede de estradas municipais.
Os labores previstos estanse realizando simultaneamente en diversas localizacións grazas á fórmula establecida do contrato dividido en cinco lotes e limitada a adxudicación a un por licitador. En total o Concello destinará a esta campaña 140.000 euros procedentes integramente de fondos municipais.
