O Concello destina en torno a 100.000 euros a estes traballos de desbroce
Nestes momentos as actuacións de desbroce localízanse en pistas e camiños forestais. Todos os anos o Concello da Laracha realiza a finais da primavera, durante o verán e nas primeiras semanas do outono a campaña de roza e desbroce de cunetas. Faio tanto nas estradas locais das trece parroquias como nos terreos de titularidade municipal que non forman parte do servizo de limpeza e mantemento de zonas verdes.
A día de hoxe xa están executados o oitenta e cinco por cento dos traballos previstos. Agárdase que a final do mes poida darse por finalizada a campaña. As actuacións están practicamente completadas nas estradas asfaltadas e nestes momentos estase intervindo nas últimas pistas e camiños forestais de Montemaior e de Erboedo.
Neste ano tan atípico o Concello adaptou as fases de desenvolvemento desta campaña municipal ás restricións de mobilidade decretadas polas autoridades sanitarias. Por iso, os desbroces comezaron a mediados de maio nas catro parroquias de maior densidade de poboación (Torás, Lestón, Caión e Cabovilaño). En total actuouse nuns 660 quilómetros da rede de estradas.
No relativo ás parcelas municipais, tamén están feitos a maioría dos traballos nos 150.000 metros cadrados de superficie. Inclúen zonas como o entorno do sendeiro azul de Caión, espazos de aparcamento das parroquias e outras áreas verdes e equipamentos. En determinados casos preveuse durante a campaña de desbroce a realización de dúas e ata tres cortas no mesmo ámbito. Son esas intervencións en puntos nos que xa se actuara previamente as que restan por acometerse. O Concello destina en torno a 100.00 euros procedentes integramente de fondos municipais ao financiamento destes traballos.
