O próximo acordo plenario permitiría dispoñer dos fondos do crédito para contratar obras
O grupo de goberno da Laracha someterá a ditame plenario a aprobación dun suplemento de crédito e un crédito extraordinario. Así, posibilitarían incorporar aos orzamentos municipais 236.546,70 euros procedentes do remanente líquido de tesourería. A finalidade é executar diversas actuacións de interese xeral. Este asunto será elevado ao Pleno ordinario que se celebrará o venres. A exposición foi unha sesión da Comisión Informativa Permanente de Asuntos Económicos, Facenda e Especial de Contas celebrada onte.
Dese suplemento de crédito, 75.000 euros terían por finalidade incrementar a partida orzamentaria destinada á infraestruturas de saneamento e abastecemento de auga. Trátase de executar con carácter de urxencia un importante proxecto valorado en 85.000 euros. O mesmo ten por finalidade reforzar a traída na parte alta da parroquia de Cabovilaño e na de Lemaio.
Nesas zonas, en especial nos núcleos de Nogán, Cardois, Xeriz, Tuixe e A Teixoeira, detectouse que, de xeito puntual, o caudal de auga e a presión vense afectados en determinadas vivendas. Con esta actuacións resolveríanse dita problemática. O acordo do Pleno deste venres será preciso para dispoñer do financiamento para contratar a execución do proxecto e iniciar as obras á maior brevidade posible.
