O convenio entre o Concello e a Confraría de Pescadores de Caión ascende a 5.000 euros
José Manuel López Varela, alcalde da Laracha, e José Héctor Morgade Carracedo, Patrón Maior de Caión, rubricaron a renovación do convenio entre o Concello e a Confraría de Pescadores de Caión.
Dito convenio establece que o Concello da Laracha concede unha subvención nominativa de 5.000 euros. A finalidade é cooperar no financiamento dos gastos derivados da apertura ao público e o mantemento das instalacións do Arquivo da Pesca. O museo é propiedade da Confraría.
Dito arquivo foi creado para poñer en valor o rexistro histórico da Confraría, dignificar o oficio dos pescadores e divulgar a cultura mariñeira. Atópase no baixo do edificio do pósito, en pleno paseo marítimo de Caión. Alberga unha exposición permanente que percorre a historia e a cultura mariñeira da vila a través da actividade pesqueira. Por medio de documentos, obxectos e paneis explicativos pódese coñecer o pasado de Caión, desde os antigos baleeiros ata a época dourada da pesca no século XX.
