O centro sociocultural de Paiosaco, situado na rúa A Porta Santa, é a infraestrutura municipal de referencia nesa vila
O centro sociocultural de Paiosaco está a ser obxecto dunha intervención consistente na renovación da marquesiña existente na parte posterior do inmoble. Fai a función de cuberta no acceso exterior e independente ao salón de actos.
Os traballos de carpintería metálica que se están a executar teñen por finalidade reparar os danos que presentaba a infraestrutura tras levar anos exposta ás inclemencias do tempo. Tamén, eliminar as humidades e dotala cun material máis resistente. Ademais, será instalado un peche metálico.
O alcalde, José Manuel López Varela, e o concelleiro responsable da área de obras públicas, Jesús Souto, coñeceron en primeira persoa o avance nas obras nunha visita ao lugar das actuacións.
O centro sociocultural de Paiosaco, situado na rúa A Porta Santa, é a infraestrutura municipal de referencia nesa vila. Alberga a biblioteca, o centro social da terceira idade, aulas multiusos e un salón de actos. Ademais das obras que se están a realizar na marquesiña, a partir do mes de xullo será obxecto doutra intervención. Neste caso na especialidade de pintura industrial do Obradoiro de Emprego A Laracha V.
