Están afectados polo expediente 21.716 metros cadrados de superficie en Montemaior
Na última sesión da Xunta de Goberno Local foi aprobado o proxecto de expropiación das fincas que albergan a carballeira de San Fins, na parroquia de Montemaior. O documento delimita o ámbito territorial en canto a situación xeográfica, superficie e lindes, con descrición dos bens e dereitos afectados e a relación das persoas titulares dos terreos. Está previsto un investimento de 72.620,81 euros por parte do Concello para adquirir unha superficie de 21.716 metros cadrados. Están repartidos en doce parcelas catastrais clasificadas no Plan Xeral de Ordenación Municipal (PXOM) como solo rústico de protección natural polo sistema de espazos libres. A taxación foi realizada mediante a capitalización da renda anual da explotación segundo o seu estado. A tramitación é polo procedemento de taxación conxunta.
Continuando cos trámites administrativos, o acordo da Xunta de Goberno Local será publicado no Diario Oficial de Galicia (DOG) e estará un mes en exposición pública antes de elevarse a definitiva. Así mesmo, notificarase aos propietarios dos terreos e abrirase o período de alegacións ao xustiprezo.
Espazo econatural
Unha vez completado o procedemento de compra dos terreos en Montemaior, o Concello ten proxectadas unha serie de actuacións dirixidas a poñelos en valor econatural. Tamén, evitar o deterioro da carballeira de San Fins. É un ámbito de especial riqueza ao albergar árbores autóctonas –principalmente, carballos e castiñeiros-, nalgúns casos centenarias.
O dobre obxectivo último é conservar o patrimonio natural municipal e habilitar neste espazo unha nova área de ocio e esparexemento. Tanto para uso e disfrute da cidadanía larachesa como para aumentar o potencial turístico do municipio. O alcalde da Laracha, José Manuel López Varela, xunto aos concelleiros Jesús Souto e Patricia Bello, visitaron a carballeira de San Fins para coñecer o seu estado actual.
