As bibliotecas municipais da Laracha, Paiosaco e Caión reabrirán ao público mañá, lunes 18 de maio. Farano coas limitacións establecidas no protocolo de actuación fronte á Covid-19.
Soamente se ofrecerá o servizo de préstamo de libros, que unha vez devoltos estarán catorce días en corentena de acordo á normativa das autoridades sanitarias. Por este mesmo motivo, os préstamos limitaranse a dous libros por persoa durante 21 días. Os servizos que non estarán dispoñibles son os de lectura en sala e o emprego dos ordenadores.
Asimesmo, o aforo limitarase a un único usuario por quenda no interior da instalación. A excepción dos menores de doce anos que deben acudir acompañados dunha persoa adulta. Os usuarios que acedan ás bibliotecas deberán facelo con máscara e empregar o xel hidroalcóholico que estará á súa disposición no interior das instalacións. En todos os casos, os libros serán solicitados polos usuarios e proporcionados polo persoal da biblioteca, tocándoos o menos posible.
Horarios de luns a vernes
Ademais, e importante coñecer que os horarios de apertura das bibliotecas municipais serán os seguintes de luns a venres:
- Biblioteca municipal da Laracha: de 12 a 14 h pola mañá e de 17 a 19 h pola tarde.
- Bibliotecas municipais de Paiosaco e Caión: De 17 a 20 h.
Xunta de Galicia
Ademais, as bibliotecas e museos xestionados pola Xunta de Galicia reinician esta semana a súa actividade presencial, coa apertura progresiva dos equipamentos en varias fases e a reincorporación do seu persoal. Farano a través dun protocolo específico que establece pautas e medidas de protección e hixiene co obxectivo de garantir a seguridade sanitaria para traballadores e usuarios.
Os primeiros equipamentos en reabrir as súas portas serán as sete bibliotecas públicas da rede autonómica, que operarán a partir de mañá tras realizar na última semana as actuacións previas establecidas polo Ministerio de Sanidade. Trátase da Biblioteca de Galicia, na Cidade da Cultura; a Biblioteca Miguel González Garcés da Coruña, a Biblioteca de Lugo, a de Ourense, a Biblioteca Antonio Odriozola de Pontevedra, a Biblioteca Ánxel Casal de Santiago e a Biblioteca Juan Compañel de Vigo.
