O próximo venres desde as 19:00 horas no centro sociocomunitario de Caión abordarase a realidade, os retos e o valor das aves mariñas
A charla divulgativa Veciñas do Mar e do Ceo, trata sobre a situación das distintas especies de aves mariñas que residen ou transitan pola Costa da Morte. Será no Centro Sociocomunitario de Caión o vindeiro venres 22 de outubro, ás 19.00 horas, con entrada gratuíta ata completar a capacidade máxima da sala. Organiza, o Centro de Extensión Universitaria e Divulgación Ambiental de Galicia (CEIDA) en colaboración co Concello da Laracha
A actividade ten o obxectivo de dar a coñecer entre a veciñanza de diferentes vilas costeiras da Costa da Morte, o Golfo Ártabro e o Ortegal a información recollida no marco do proxecto Aves Ártabras (ÁRTABRO2) .
#avesartabras aposta pola investigación, coñecemento e posta en valor das aves mariñas da costa coruñesa entre as Illas Sisargas e a provincia de Lugo. Estuda especies como o corvo mariño cristado, gaivotas, pardelas e outras, así como súas interaccións coa actividade pesqueira. Froito deste proxecto realizanse censos e traballos moi interesantes ao longo da costa de todo este territorio. En concreto, na costa da Laracha, na contorna de Caión e Punta Atalaia, existe unha importante colonia de cría de corvo mariño, especie ameazada.
Zona de Especial Protección para as Aves
Estas investigacións enmárcanse na continuación do proxecto Aves Ártabras do CEIDA (ÁRTABRO2). Trátase dunha iniciativa que busca a declaración de Zona de Especial Protección para as Aves (ZEPA) no Golfo Ártabro. Este proxecto tivo a súa primeira fase durante o ano 2019 e ten a súa continuación neste 2021. Conta co apoio da Fundación Biodiversidad do Ministerio para la Transición Ecológica y el Reto Demográfico, a través do Programa Pleamar.
Pola súa parte, o Centro de Extensión Universitaria e Divulgación Ambiental de Galicia (CEIDA) é un consorcio conformado pola Xunta de Galicia, a Concellería de Medioambiente e o Concello de Oleiros. Leva máis de 20 anos sendo o Centro de Referencia para a Educación Ambiental en Galicia. Ten a súa sede no Castelo de Santa Cruz.
