O obxectivo é aumentar o caudal da traída e a presión da auga para garantir a calidade do servizo tamén durante os picos de maior consumo
O Concello da Laracha iniciará o proceso de contratación do proxecto dirixido a reforzar o servizo de abastecemento de auga potable na zona alta da parroquia de Cabovilaño. A actuación ten por finalidade aumentar o caudal da traída da rede que abastece ás vivendas situadas en Nogán, Cardois, Xeriz e A Teixoeira. Neses núcleos detectouse que, de xeito puntual coincidindo coa época estival, a presión da auga é insuficiente.
Esta problemática resolverase coa instalación dun bombeo equipado cun variador de frecuencia. A inicitiva permitirá, de modo automático, adaptar as condicións do subministro ás necesidades que se presenten. Así garántese a prestación do servizo con plena garantía de calidade durante todo o ano. A execución do proxecto será financiada integramente con fondos propios municipais.
Outras localizacións
Paralelamente, o Concello ten en fase de estudo e análise outras localizacións rurais nas que se mellorará e ampliará o abastecemento. Neste sentido, a próxima construción de novos depósitos de cabeceira permitirá a medio prazo, ampliar a cobertura deste servizo. A inicitiva conta coa colaboración da Xunta de Galicia a través de Augas de Galicia cun investimento de 1.850.000 euros entre 2022 e 2023.
