No vindeiro Pleno municipal o Bng expoñerá os motivos do pedido de melloras en Soandres
Xoán Sande Muñiz, portavoz do Grupo Municipal do BNG da Laracha presentará mo vindeiro Pleno da Corporación Municipal o arranxo dunha estrada na parroquia de Soandres e unha pista forestal.
Explica que «a estrada que vai do lugar do Priorato en Soandres cara ás Senras e Encián atópase nun lamentábel estado de conservación. Con moitas fochancas e un firme en moi mal estado, desde hai moito tempo. As veciñas e os veciños que viven na zona ou utilizan esta vía teñen dereito a infraestruturas en condicións xa que pagan os seus impostos igual que o resto da veciñanza».
A estrada que vai do lugar do Priorato na parroquia de Soandres (onde se atopa a igrexa-mosteiro) cara os lugares das Senras e Encián atópase nun estado moi lamentábel, con multitude de fochancas e cun firme en moi malas condicións. «O grupo municipal do BNG da Laracha levará ao próximo Pleno da Corporación unha iniciativa na que demandaremos que desde o goberno municipal se aborde o arranxo desta estrada o máis axiña posíbel», afirma.
Por outra banda, «desde o Bng solicitaremos tamén o arranxo dunha pista forestal na mesma zona, xusto a primeira que hai pasando a igrexa-mosteiro de Soandres en dirección ás Senras. Está tamén bastante destrozada e resulta de difícil acceso incluso para tractores. Por iso, demandaremos o arranxo desta pista forestal ou a inclusión da mesma no primeiro plan da Consellería de Medio Rural.
