Foron instalados carteis sobre as medidas de seguridade obligatorias tanto na área recreativa como na praia de Caión
O Concello da Laracha reabrirá mañá ao público á área recreativa de Gabenlle. Permitirase o acceso ao recinto dende o mércores pero non poderán empregarse nin os parques infantís nin ao circuíto biosaudable. A apertura é de acordo coa orde SND/442/2020 do Ministerio de Sanidad para a flexibilización de determinadas restricións en aplicación da fase 2.
Así, en todos os accesos á área recreativa de Gabenlle, e tamén nos da praia de Caión na que o baño e tomar o sol está permitido desde onte luns, o Concello colocou carteis informativos (velo debaixo). Alí pode verse as principais medidas de seguridade de obrigatorio cumprimento. Trátase de hixiene das mans, evitar a práctica de deportes colectivos, respectar o perímetro de seguridade de dous metros e non xuntarse grupos de máis de quince persoas.
Ademáis, o Concello lembra que continúa prohibido en todo o termo municipal, o acceso a todos os parques infantís, circuítos biosaudables e pistas polideportivas descubertas. Ditas infraestruturas públicas permanecen precintadas pola Policía Local.
Aplicar bonificación a dous proxectos
Por outra banda, este venres celebrarase o Pleno ordinario correspondente ao mes de maio. O lugar, a Casa da Cultura para posibilitar gardar o distanciamento social. Un dos asuntos que se elevará ao Pleno foi sometido hoxe a ditame da Comisión Informativa de Asuntos Económicos, Facenda e Especial de Contas. Consiste na proposta de conceder bonificación do 95% no imposto municipal de construcións, instalacións e obras (ICIO) aos proxectos de construción de dúas naves industriais no ámbito do parque empresarial.
Este incentivo está contemplado no artigo 6 da ordenanza fiscal número 17 ao tratarse de actuacións de especial interese por concorrer circunstancias de fomento do emprego. En ambos casos as obras teñen por finalidade a implantación de empresas no polígono industrial.
