O domingo 13 e o 27 propóñense andainas en Carballo e Oleiros para o público en xeral
As andainas polo entorno do río Acheiro incluída no Outono Activo e que fora apraza polas condicións climatolóxicas adversas, foi reprogramada para este xoves 10 de novembro. Os participantes sairán en autobús desde a Praza Les Sables d’Olonne ás 10:00 horas e terán transporte de regreso ao rematar o percorrido. Trátase de cinco quilómetros de distancia e dificultade moderada a carón do río. O inicio e fin é o Centro de Interpretación dos Muíños de Auga da Costa da Morte de Golmar. A inscrición é gratuíta e debe formalizarse no Concello ou cubrindo en liña o formulario dispoñible na web municipal.
Dito programa vai dirixido a persoas maiores de 55 anos de idade e ten por obxectivo ofrecer a oportunidade de realizar actividade física ao aire libre. Tamén, descubrir lugares e paraxes de alto valor natural, paisaxístico e patrimonial pola riqueza etnográfica dos muíños de auga. Ademais desta andaina polo río Acheiro, xa se fixeran outras dúas bordeando o Bradoso e o Anllóns.
Para todos os públicos
Paralelamente, o Concello da Laracha ten en marcha outro programa de rutas. Trátase das Andainas de Outono, pero neste caso dirixido a todos os públicos e con percorridos fóra do termo municipal da Laracha.
Este domingo 13 de novembro farase a Ruta das Férvedas en Carballo, con inicio na Férveda de Rus e fin na capela de San Paio. E un percorrido de once quilómetros e dificultade moderada.
A última andaina será pola costa de Dexo, en Oleiros, o domingo 27 de novembro. O punto de inicio está previsto en Seixo Branco e o remate, na igrexa de Santa María de Dexo. A distancia é de sete quilómetros e a dificultade é baixa.
En todos os casos o autobús partirá desde a praza Les Sables d’Olonne da Laracha ás 9:30 horas, mesmo lugar ao que regresará ao remate da actividade. A participación vai dirixida a persoas de calquera idade empadroadas no termo municipal da Laracha. As inscricións son gratuítas e poden formalizarse tamén no Concello ou cubrindo en liña o formulario na web municipal.
