O paseo marítimo de Caión sufre un acto vandálico. Foron destrozadas as balizas do alumeado público provocando danos por un valor estimado nuns 15.000 euros. Os feitos, que investiga a Policía Local, son especialmente graves ao terse realizado durante o estado de alarma.
O tramo do paseo marítimo de Caión que comunica a praza Eduardo Vila Fano co aparcamento da praia, xunto á entrada principal ao areal, foi obxecto dun acto vandálico. Foi nas últimas horas e supuxo o destrozo de todas as balizas -unhas trinta e cinco- do alumeado público.
Ante a situación, a Policía Local iniciou unha investigación para tratar de dar coa persoa, ou persoas, responsable destes feitos. Son especialmente graves ao significar, ademais, o incumprimento das medidas de confinamento durante o estado de alarma decretadas polo Goberno. O Concello da Laracha estima nuns 15.000 euros os gastos que suporá a reposición dos equipos danados polo acto vandálico.
