Hoxe celebrouse a Feira das Cereixas. Nesta ocasión, a que é a feira de Paiosaco máis importante do ano, e que conta co distintivo de Festa de Galicia de Interese Turístico, foi atípica. En cumprimento das normas sanitarias, non houbo os tradicionais actos festivos e limitouse á actividade comercial.
Con respecto ás feiras realizadas no mes de xuño, este domingo flexibilizáronse as medidas de seguridade. É por iso que se utilizou a totalidade da superficie do recinto feiral, podéndose comercializar todos os produtos, incluídos téxtil e calzado.
Así, para garantir a seguridade na actividade, os pasillos tiveron unha amplitude mínima de catro metros e, todos os postos, unha separación entre si de dous metros. Do mesmo xeito que nas últimas feiras, os postos montáronse a partir das 7:00 horas. Sempre baixo a supervisión da Policía Local, Protección Civil e encargados municipais da feira.
Unha vez máis, o Concello da Laracha agradece a colaboración dos comerciantes, compradores e asistentes. O cumprimento das medidas de seguridade foi exemplar durante as feiras celebradas en xuño e que se repetiu hoxe durante a Feira das Cereixas.
