Veciña do lugar de Condes, parroquia de Soandres, a señora Dorinda recibiu a visita do alcalde da Laracha
A señora Dorinda Rebón Velo celebrou o seu 100 aniversario na súa vivenda do lugar de Condes, na parroquia de Soandres. É a mesma casa na que naceu e na que sempre residiu, actualmente xunto ao seu fillo Desiderio, a súa nora Aurora e as súas dúas netas, Sandra e Lucía.
Nesta sinalada data, o alcalde, José Manuel López Varela, visitouna para felicitarlle o aniversario e agasallala en nome da Corporación Municipal cunha placa conmemorativa e un ramo de flores. Na foto desde nota está acompañada polo seu fillo, a súa nora, as dúas netas, os representantes do Concello (o alcalde, José Manuel López Varela, e as concelleiras Adelina Liste e Begoña Domínguez) e o párroco de Soandres (D. Manuel Mallo).
Dorinda é a maior de once irmáns e ten vinte e tres sobriños. Tivo un único fillo, de solteira, e afirma que “o secreto para durar cen anos é que nunca me casei”. Dedicouse durante moitos anos á agricultura e á gandería. Considerando a súa idade, atópase nun envexable estado de saúde, tanto física como mental, e asegura acompañar todos os días o xantar cun vaso de viño e un café. Lembramos que no Concello da Laracha hai oito veciños con máis dun século de vida, dos cales seis son mulleres e dous son varóns.
