O delegado da Xunta na Coruña, acompañado polo alcalde da Laracha, visitou o centro de atención temperá do Concello.
O delegado da Xunta na Coruña, Gonzalo Trenor, acompañado polo alcalde da Laracha, José Manuel López, visitou a unidade de atención temperá desta casa consistorial para informar da resolución das axudas para a creación de unidades de atención temperá para parte dos entidades locais. Con esta nova orde atenderanse máis de 5.000 nenos de toda Galicia que presenten problemas de desenvolvemento.
No encontro, o representante do Goberno galego informou de que a comarca de Bergantiños-Costa Morte continuará con dúas unidades. Unha na Laracha e outra solicitada pola agrupación de concellos de Dumbría, Camariñas, Carnota, Cee, Corcubión, Fisterra, Mazaricos, Muxía, Zas. e Vimianzo. Estes dous centros contarán cunha axuda que inclúe a actividade dos anos 2022-2023-2024 de máis de 568.000 euros para garantir o seu funcionamento.
Ademais, Trenor, valorou unha importante aposta nos últimos anos por estes servizos asistenciais. Neste sentido, precisou que en 2009 había na nosa Comunidade dúas unidades que prestaban atención a 15 concellos galegos, mentres que na actualidade xa son máis de 40 os centros que dan servizo a máis de 200 concellos. “É dicir, cada vez son máis as familias que teñen este servizo xunto ás súas casas, que favorece a igualdade de oportunidades con respecto ás familias que viven nas cidades”, apuntou.
Tamén, o representante do Goberno galego, sinalou que “este recurso permite actuar ante posibles problemas no desenvolvemento dos nenos ata os 6 anos”. Como novidade, esta convocatoria —dotada con 12 millóns de euros— terá carácter plurianual, o que permitirá dotar aos concellos de máis facilidades para a súa execución, ao garantir a seguridade financeira e reducir o *papelame para solicitar axudas.
