No que vai de ano notificouse a preto de 300 propietarios a obriga de limpar e manter as súas parcelas
Ao longo deste ano o Concello notificou a preto de trescentos propietarios de parcelas, terreos, fincas e solares, a obriga de mantelos nas condicións axeitadas de limpeza en cumprimento da normativa vixente.
En todos os casos o procedemento iniciouse co correspondente informe da Policía Local detallando os terreos desas características que non se atopaban en boas condicións de conservación. De acordo a ditos informes, o Concello realizou o envío das notificacións aos seus propietarios, requiríndolles a execución das actuacións correspondentes á maior brevidade.
Campaña informativa e sancions
Todos os anos o Concello da Laracha desenvolve unha campaña informativa sobre estas cuestións, con especial incidencia na primavera e no verán por tratarse das épocas de maior crecemento da biomasa, aínda que tamén nos meses restantes se levan a cabo actuacións dirixidas a cumprir as condicións de seguridade, hixiene, salubridade e ornato público das fincas privadas.
Nos requirimentos advírtese aos titulares dos terreos que o incumprimento da normativa vixente pode implicar a apertura de expedientes sancionadores por importe desde os 1.000 (infracción leve) ata os 100.000 euros (infracción grave), ademais de asumir o propietario das parcelas o custe das actuacións que, no caso de ser preciso, o Concello executa subsidiariamente.
O Concello da Laracha agradece á veciñanza a súa implicación e sensibilización co mantemento en bo estado de conservación das parcelas privadas, dado que por norma xeral ditos labores se acometen en tempo e sen necesidade de requirimentos previos.
