O concurso está dirixido ao alumnado de educación primaria do termo municipal
O Concello da Laracha presentará nos próximos días o programa de actividades que se levará a cabo en torno ao Día das Letras Galegas, entre elas, un concurso. Por segundo ano consecutivo, o concurso de marcapáxinas convida a participar ao alumnado de educación primaria. Isto é, a todos os nenos empadroados no termo municipal de idades comprendidas entre os seis e os doce anos.
As elaboracións deben ser feitas, preferentemente, en cartolina e ter un tamaño de vinte centímetros de alto e seis centímetros de ancho. Poden presentarse desde hoxe e ata o día 18 de maio en calquera das bibliotecas municipais (A Laracha, Paiosaco e Caión).
Están establecidas dúas categorías de premios, sendo a primeira para o alumnado de 1º, 2º e 3º, e a segunda, para os de 4º, 5º e 6º de primaria. En cada unha haberá dous premios compostos por lotes de libros ou material didáctico e educativo adaptado a cada grupo de idade. Ademais, os dous traballos que obteñan o primeiro premio de cada categoría serán editados polo Concello e distribuídos como os marcapáxinas oficiais da rede de bibliotecas municipais deste ano. (Bases completas no cartel de debaixo).
Os propósitos esenciais da organización deste concurso son estimular a creatividade dos nenos e achegalos ao mundo dos libros animándoos a visitar as bibliotecas en torno a unha data tan sinalada como o Día das Letras Galegas.
