Mañá, venres 23 a partir das 20:00 horas no auditorio de Paiosaco, última función con unha comedia
Este venres pecharase o ciclo Primavera Teatral de Paiosaco con unha comedia. É a última función que, igual que as dúas anteriores, terá lugar no auditorio do centro sociocultural a partir das 20:00 horas.
Finalmente a peza que se porá en escena é «Arroutadas«, dirixida a maiores de dezaseis anos de idade. Consiste en tres pezas humorísticas diferenciadas a cargo de Mario Rodríguez, Uxía Algarra e Lydia Prada.
A entrada é gratuíta ata completar a capacidade máxima da sala. O público asistente deberá portar a máscara facial durante toda a función. O cambio no cartel –no que inicialmente estaba programada a obra Mostellaria– está motivado pola imposibilidade de acudir dun actor principal por motivos persoais.
Mes do libro
Outro evento cultural organizado polo Concello –neste caso, coa colaboración da Deputación da Coruña– é o espectáculo infantil Ris Ras, de Baobab Teatro, incluido no programa do Mes do Libro.
A peza, dirixida a nenos de entre un e oito anos de idade, fai viaxar ao público a través da música, os xogos, os enredos e as historias tradicionais. Terá lugar o sábado a partir das 18:00 horas na Casa da Cultura da Laracha. A entrada é gratuíta e soamente se permitirá o acompañamento de adultos no caso de que non se complete cos cativos a capacidade máxima da sala. En todo caso, os nenos estarán ao cargo de persoal municipal durante o espectáculo.
