Os socialistas levan a pleno a remodelación da contorna da rúa Epifanio Campo e a rúa Santa Lucía para facela máis accesible
O grupo municipal socialista da Laracha levará ao pleno municipal unha moción na que demanda a remodelación dun espazo público. Trátase da contorna da rúa Epifanio Campo e a rúa Santa Lucía, habilitando para dita actuación o crédito necesario a través do Plan de Obras e Servicios (POS) da Deputación da Coruña.
“A finalidade -da remodelación- é conseguir unha Laracha accesible para todas e todos. Suprimindo barreiras, fomentando a accesibilidade así como a adaptación de instalacións, edificacións e espazos libres xa existentes”, explica a portavoz Paloma Rodríguez Castiñeira.
Así mesmo agrega: “Facémonos eco da reivindicación de persoas con problemas de mobilidade reducida que teñen nos seus desprazamentos cotiás na rampla de acceso dende a rúa Epifanio Campo Núñez á rúa Santa Lucía.
Aproveitando esta demanda, “solicitamos o arranxo da pavimentación do que podemos chamar praza, pois está desnivelado e os sumidoiros atascados fai que se inunde a zona”.
Nunha segunda moción, o Psoe pedirá que o concello “inste á Xunta de Galicia a que proceda á compensación dos sobrecustos que as administración locais están a soportar como consecuencia dos gastos de limpeza e desinfección dos centros educativos”.
